domingo, 2 de dezembro de 2012

o retornado

Acabantes pasar la primer nueche nun claustrofóbicu cuartu de la pensión Âncora d'Ouro del café O Piolho, en Porto, decidimos mudanos a otra fonda na cercana Rua Carmo, onde había un cuartu llibre aguardilláu, que polo menos tenía ventana y daba a la cai. 

Esa nueche, después de cenar nuna taberna pa turistes de A Ribeira, animaos pol vino y escarmentaos pol cutu que tiraba dende'l río, entramos nuna discoteca de la Rua das Flores, enfrente la Estación de S. Bento, a escalecer bailando. Ellí conocimos a Miguel, un mozambicanu de güeyos grandes y fondos, que se punxo a bailar con nosotros, contaxáu poles nuestres ganes de folixa y que s'empeñó en convidanos a les siguientes tres copes. A la cuarta foi él mesmu el que nos pidió con una amabilidá esquisita si lu podíemos convidar nós a él. Mientres yo m'allegaba a la barra a pidir les consumiciones, el mozambicanu dixo-y a Mercedes que diba un momentu al serviciu y desapareció metanes el turdeburdiu de la discoteca. Volví coles copes y tuvimos esperando por él un bon ratu, hasta que yo decidí acercame a los baños a ver si-y pasara daqué y podía aidalu. Miré puerta per puerta y comprobé que nun taba. Tampoco volviera al llau de Mercedes. Cuidamos qu'igual nun s'alcontraba bien y saliera a la cai a tomar un poco l'aire. El casu ye que despreocupámonos de Miguel y siguimos la nuestra fiesta, dexando la so copa nun de los posadorios de la pista de baile. 

Bailamos y enfilámonos como diba tiempu nun lo facíemos. Yo nin siquier m'alcuerdo bien cómo consiguimos xubir pela Rua dos Carmelitas (onde ta la célebre Livraria Lello & Irmão ) y llegar a la nuestra pensión del Carmo. L'únicu recuerdu que tengo y que nun se m'escaez, ye d'una vez nel nuestru cuartu, con Mercedes na cama y yo fumando un pitu na ventana que daba pa la Facultá de Ciencies. Entós paecióme acolumbrar a Miguel metanes la cai. Taba a piques de cruzar un pasu de cebra y yo, enfiláu como taba, diome por llamalu a voces. Él ya empezara a cruzar la cai y volvióse con una espresión, que me paeció alloriada, ensin teneles toes consigo. Fíce-y un xestu de saludu y nesi entós apareció un taxi a tola velocidá y llevólu per delantre. Contemplé la escena horrorizáu y respigóme inda más ver que'l taxi nun detenía la so carrera...y lo más plasmante, nel adoquinao de la calzada nun había seña del atropelláu. Tenté despertar a Mercedes, pero taba enforma durmida. Salí del cuartu, baxé a la cai, reparé pal sitiu onde viera al taxi esfrellase con Miguel. Nada. Nin un pingu de sangre. Al otru día conté-ylo a Mercedes y naturalmente nun me creyó, díxome que lo soñara.

Yo mesmu acabé por pensar que fuera un sueñu, productu del munchu alcohol inxeríu. Nun volví echar más tres d'ello, inda l'alcordanza d'aquella estraña nueche enxamás se me esborriara. 

Por eso güei, de la que sacaba a los perros, después de cenar, percorriendo'l mesmu paséu de toles nueches pel Muro de San Llorenzo hasta'l Rinconín y volviendo pela carretera que baxa del Infanzón, nun pude menos d'estremeceme al topar na marquesina d'una parada del autobús urbanu, enfrente l'Hotel Begoña Park, una sombra que me resultaba vagamente familiar. Yera un home de raza negra sentáu coles piernes cruzaes nel bancu de la marquesina. Llevaba una parka col capiruchu puestu y al pasar xunta él colos perros, quitó'l capiruchu y con una amabilidá esquisita y un vagu acentu portugués preguntóme la hora. Saqué el móvil y miré'l reló.
    - La una y cuartu -díxe-y, ensin atreveme miralu.
Sentí que me contestaba con dalgo asemeyao a un sospiru. Los perros tiraben de mi y despidime d'él con un xestu, siguiendo'l mio camín. De nueche, per esa zona siempre tira una ventolera tremenda n'hibiernu o en veranu. A veces tuse ún y nun oi la so propia tos. Yo sentí perfectamente, como si me lo susurriaran al oyíu, aquella voz portuguesa, amoyentada pola sálabre señaldá d'África:
    -É boa hora para marchar-me a casa.

Sem comentários:

Enviar um comentário