quinta-feira, 24 de junho de 2010

Je me souviens

Nueches del hibiernu del 85,
cais allumaes pola lluz secreto
de les confidencies y la vida
qu'inda alendaba 
en dos o tres bares abiertos,
les nuestres palabres
una foguera
a la qu'arrimar les manes
y amosar
una regaya del corazón,
los nuestros rancores
tovía enemigos mui llonxanos,


cais de La Felguera
embaxo un llátigu d'orpín,

panteres del recuerdu
na mirada miope y cabal
d'Alberto Vega,

un home solu cruza
colos brazos n'alto
ríos de marihuana,
va buscando
un requexu afayadizu
onde dalguién lu quiera crucificar,

ríos de rises
de Lauro, Niebla, Sanmi, Yuri...
            Ubi sunt
Quique desarmando la bolera
de rodiellles na cera
suplicando anfetamines
a la lluna,
el tactu duce
de les tetes de Y.,


Je me souviens
les cais enceses
del hibiernu del 85
na Felguera,
alcuérdome bien,
sigue a respigame
el tactu duce
de les tetes de Y.,
l'agullíu remotu del llobu
alló nel monte.






quarta-feira, 23 de junho de 2010

povisa nos güeyos

Sabía que la povisa
ye frío, 
alcuando
el so pesu leve
xelóme los güeyos,
cególos
col so deu
espolvoriáu
de diamante,

povisa frío,
conozo bien
el so aliendu
de muertu
nos párpagos
trémoles,


llonxe
del agua
que pinga los praos
y les guedeyes arispies
del monte,
alluende
les resquiebres húmedes
del ríu y les zreces
nel piel del aire,

sé qué nada
rescalva la povisa frío,
que xela y manca
como diamante
espolvoriao
nes niñines
de los güeyos,
como plombo delío
nuna fería en carnes.



 

terça-feira, 15 de junho de 2010

l'esconderite del fríu

Escuéndeste na lluz,
en zones ocultes
de los díes
que dexa correr
la ciudá
como un ríu
ente les rieres
del silenciu,

guárdeste
dientro una lluriga
allumada día y nueche
col escamplor
de tolos pasos
perdíos
a la busca 
un camín
nel qu'esborriar
les buelgues
pasaes y toles del futuru,
les que pudieren delatar
el to rastru como la babaya
d'un llimiagu,

escuéndeste
nel bardial
como un guxán de lluz
vedáu a la vista
de los caminantes,
como un llumeral
que namás
siente arder
alló alluende
no cimero
el llobu,

después de tantos años,
después de tantes tormentes
allumes como
una estrella de xelu
yes una foguera
que nun escalienta
nengunes manes,
nengún rancor.

sábado, 12 de junho de 2010

la llave

Cuantayá
tuvi la llave
d'un cuartu pequeñu
escuru, húmedu,
coles parés
trémoles 
de folganza
y ardor,
tamién 
de sueños,
sudu, saliva
bendita,
benditos
pasos
los que a ende
m'encarrilaben
rinchando
escaleres de maera
podre
vieya
como la emoción
de ser naide,
namás el que llega
y marcha
y nun queda,


cuantayá
tuvi esa llave,
una razón
pa despertar
a otru día
con dalgo ente les manes,
una llave
poderosa
como un revólver
o una caricia,


tuvi la llave,
el secretu d'un camín,
delles señes
privaes y puerques
pa llegar al cuartu pequeñu,
éscuru, húmedu,


agora
nun tengo llave,
perdila
y ye igual,
de xuro cambiaron
la pesllera
y tampoco valía
aquella llave,
qué más dará,


ye asina,
miembro'l camín,
les sos buelgues ocultes,
la sede llonxana
de los mios pasos,


nun siento vergüeña dala
por tener de picar
a esa puerta.

sexta-feira, 11 de junho de 2010

despidida xunta'l riu

Los nuestros díes
llevólos el ríu
nun busques
rastru d'ellos
na oriella 
espelurciada
de mierda y ramasca
nun pidas
cuenta del so pasu
sonce 
ente humeros
y ablanales,
nun esfoces
en sangre seco
de la llaceria
queriendo
una caricia
que te devuelva
la llingua
bravo del sal
en sexu,


si quies beber
un posu
de la vieya fonte
que nos dio
sabeduría y sede
de ser dalgo más
que rabia y deséu,
faite fuerte
caltién la voltura
en gargüelu
nun dexes que l'ascu
apodere al valor
y al velenu
de la culiebra
opón la to felén
más gafa,
la más cruel,


olvida'l ríu
dexa que l'agua
t'estremeza.