segunda-feira, 3 de dezembro de 2012

asuntos privaos

    Si ente los pescadores de caña, amás de la rivalidá, esistiere l'amor, bien podía dicise d'ellos dos que lo suyo fuere un amor a primera vista. Conociéranse na punta'l muelle, a la vera'l faru pequeñu que señala pela nueche esa escollera artificial, seguramente a los barcos pantasmes, pos cuantayá que nel puertu de X., nun salen lanches a pescar enantes de l'amanecida.

    F. acababa retirase del so trabayu n'Acería y escomenzara dir toles tardes, a última hora, al dique del rompeoles a llanzar la caña y dexar que pasare'l tiempu, hasta la hora de la cena, llanzando y recoyendo la tanza del sedal ente'l ruxidoriu de los cachones qu'esfrellaben contra los cubos d'hormigón de la escollera. V., empara, yera un veteranu pescador d'aquel últimu bastión de los cais, nacíu y criáu ente redes, galipote pa calafatear les lanches y manes de xigante, endurecíes pol xarazu y les amarrres. De rapaz andara con so padre a la parrocha y al calamar. Después embarcárase a la pesca d'altura y a la marina mercante, na que terminara retirándose col grau de xefe de máquines.

    Atopábense toles tardes a escasos metros ún del otru na punta'l muelle y inda nun falaben muncho ente ellos, de vez en cuando intercambiaben dalgún comentariu sobre l'estáu de la mar o del cielu, el medrar de les mares o los últimos resultaos deportivos de los sos respectivos equipos de fútbol. Pa la otra banda del dique, había siempre media docena de competidores, tolos seis bien concentraos nel picu les sos cañes, con cara de pocos amigos, como si tuvieran xugar al póquer, y a los que raramente s'acolumbraba dirixise la palabra unos a otros.

    F. y V. falaben poco, porque nengún d'entrambos yera mui charrán que se dixere, sicasu, notábase que-yos prestaba alcontrase toles tardes nel mesmu sitiu y tar xuntos ellí llanzando'l sedal al mar.
    De vez en cuando allegábase ún al puestu del otru pa ver cómo diben les captures o por si-y facía falta una boya o talu anzuelu al so compañeru. Cosa más rara yera que s'allegraren cada vez que l'otru sacare una pieza curiosa o, en recoyendo los apareyos, al facer el recuentu final de la pesca. Alcuando llegaben abrazase, eso sí, como s'abracen los paisanos d'una pieza: mui bravamente solmenándose en llombu hasta casi mancase o quedar ensin aliendu.

    Delles tardes, de la qu'escurecía y fincaben en cantu l'horizonte unos rescamplos doraos de lluz esmuciéndose nun guedeyu de nubes más clares que les otres, confesábense secretos de la más estricta intimidá alrodiu de la so relación coles sos propies muyeres. Otres, de la que ya recoyeran la caña la media docena de competidores de la otra banda y quedaben ellos solos namás, abellugaos poles sombres escures del dique y col guiñu verde de complicidá del faru pequeñu, solventaben nel so esconderite otra clase d'asuntos privaos que naide en pueblu fuera nunca a sospechar.

Sem comentários:

Enviar um comentário