miracielos

Nunca m'interesaron muncho les hestories d'espíes como nun fueran les d'Anacleto o de Mortadelo y Filemón. Va poco sentí contar una real de la guerra civil que, quitándo-y un poco de fierro, a mi remitíame inevitablemente a los monólogos de Gila.

Cuntábala el fíu d'unos exiliaos republicanos a México nuna cafetería del centru de Xixón habrá un par de selmanes. A mi sonábame dalgo de sentí-yla al nuestru tíu Lisio, inda siempre la tuviera por inventada.

Polo visto, de la que se formó en La Felguera, un comité de guerra, tres el güelpe militar del 18 de xulio, ún de los primeros voluntarios que se presentó énte él foi una especie de tontillocu del Molín d'Argüelles al que conocíen en too Llangréu como Miracielos. Los miembros del comité, mayoritariamente cenetistes, nun duldaron n'admitir al voluntariu, argumentando que la Revolución Social yera xera de tolos individuos, independientemente de la so capacidá de discernimientu o de la so salú mental, qu'a fin de cuentes -razonaben- nun dexaben de ser ficciones burgueses. El casu ye qu'al pesar de la fondura de les sos convicciones llibertaries bien lluego s'arrepintieron de la incorporación de Miracielos a les milicies felguerines: zascandil inquietu ú los hubiere, el voluntariu, facía la Revolución o la Guerra, pela so cuenta, faciendo lo que-y petecía y lo mesmo marchaba andando hasta'l frente d'Uviéu pa volver corriendo a anunciar que los lleales tomaran la ciudá y colgaran a Aranda per una pata de la Torre la Catedral que se ponía con hachu na mano delantre la boca'l túnel de Coruxona, pasao Tuilla, a facer guardia pa impidir que los facistes avanzaren en tren hasta les cuenques mineres. La verdá nun sabíen mui bien qué facer con Miracielos y a la fin, una asamblea del comité decidió encamenta-y simples llabores de recaderu: llevaba mensaxes d'un llau a otru de la retaguardia a la vanguardia o un panchón de pan o una fardela de picadura de tabaco o unos prismáticos que se-y escaecieran a un comandante de les milicies...

Nun sé sabe mui bien cómo (probablemente como resultáu d'una negociación ente los cenetistes de La Felguera y los socialistes de Sama a cuentes de reorganizar los sos efectivos) pero Miracielos acabó trespasáu a la milicia socialista como recaderu y bien aína en recaderu personal del mesmésimu Belarmino Tomás, que-y llegó garrar un fondu apreciu.

Nos meses finales de la guerra n'Asturies cuando Belarmino Tomás se convirtió nel Presidente del Conseyu Sobernau d'Asturies y Lleón, llevó con él a Xixón, a la sé del gobiernu autónomu na Plaza del Parchís, al so fiel y lleal recaderu. Con malevolencia, dalgunos conseyeros comunistes, balburdiaben en voz baxo que Miracielos yera'l brazu derechu de Belarmino, secretariu de confianza y asesor áulicu, que yera en cierto el felguerín el que dictaba les órdenes y contraórdenes político-militares de la defensa del frente asturianu. Un llevantu -aseguraba el fíu d'exiliaos que relataba la hestoria nuna cafetería dl centru de Xixón- como tantos otros que se difundieron col enclín de baltar el gran prestixu que tenía'l cabezaleru socialista ente les mases republicanes.

Lo cierto ye que los templaos nervios de Tomás taben a piques d'esfaraguyar la proverbial cachaza del dirixente mineru a cuenta de los enguedeyos que-y armaba el so “secretariu” Miracielos. Más d'una vez tuvo a puntu de mandalu fusilar depués que-y armare dalguna gorda, sicasí, a la fin, dába-y un poco de pena del rapaz y limitábase a pidí-y que se quitare d'en delantre. Cola mano isquierda que lu caracterizaba, Belarmino dicía-y entós: “Anda, compañeru, vete perende aculló a ver si vienen los facistes y si vienen, avises”. El recaderu, llonxe d'interpretar la indirecta, pañaba la misión que-y encamentara el másimu dirixente del Frente Popular n'Asturies y pasaba hores, alcuando díes enteros coles sos nueches, acolumbrando l'horizonte de les estremaes llinies de frente con unos prismáticos. Nel so estrictu sentíu del deber, llegaba a veces a esguilar -con gran riesgu pa la so vida y pa la de los viandantes de la Plaza'l Parchís- pela torre de la Iglesiona hasta los mesmos pies del Sagráu Corazón, dende onde, los díes escamplaos, disponía d'una bona panorámica de los alredores de Xixón y de munchos kilómetros a l'arrodiada. Belarmino reparaba pa él dende'l so despachu del Conseyu Soberanu y ponía una mano delantre los güeyos, diciéndo-yos a los sos collaboradores: “¡La madre que lu parió: Ésti mátase y yo nun lo quiero ver.”. Y a la media hora aparecía Miracielos, saludando col puñu na tenyera pa informar que se vía muncho fumo y muncha polvareda nel Mazucu.

Dizque los últimos díes del frente d'Asturies, cuando les tropes de Regulares del Terciu de Navarra y los moros del Tabor de Ceuta, avanzaben dende l'oriente, ensin atopar casi resistencia, Miracielo pasaba'l día engarabitáu na torre de la Ilesiona. La tarde na qu'aconceyó la última vez en Xixón el Conseyu Sobernau d'Asturies y Lleón, presidíu por Belarmino Tomás, presentóse en medio la reunión -que foi bien tensa, según toles cróniques que se conocen d'ella- un Miracielos fuera de sí, esprecetándose y berrando a grandes voces: “¡Qué vienen los facistes! ¡Acabo velos y tán ya bien cerca de Xixón! ¡Vienen los facistes, Belarmo! ¡Fai dalgo!”. Y el dirixente socialista, col rostru encarnáu y foscu poes enceses discusiones del Conseyu, debió sentir más que nunca ganes de sacar el pistolón de la cartuchera y escorrer al recaderu a tiros. En vez d'eso, tovía tuvo l'aplomu y la bonhomía pa pregunta-y a Miracielos: “¿Y per ónde dicen que vienen los facistes, compañeru?”. El dilixente vixía apuntó la pa ventana dende la que s'acolumbraba la estampa del Sagráu Corazón na torre de la Ilesiona: “¡Per ehí vienen, Belarmo, per ónde diz el santu col deu: de l'Alto L'Infanzón pa la Providencia vienen baxando! ¡Si nun me creyes a mi, enfótate nel santu, que lleva apuntando p'alló tola guerra y naide-y facía casu!”.

El fíu d'exiliaos republicanos -que nos dixo venía tolos veranos dende México a la tierra de los sos mayores- remataba'l relatu con una coda inverosímil polo forzada. Según él, Miracielos nun quiso seguir a Belarmino Tomás y el restu de dirixentes del Frente Popular cuando marcharon a embarcase nel Puertu del Musel camín de Francia. Quedara ellí, nes oficines del Conseyu Soberanu de la Plaza del Parchís, acompañando al xeneral Franco Mussió, na espera de les tropes enemigues. Y que cuando los oficiales facciosos desarmaron a Franco Mussió pa garralu presu, Miracielos llevó el puñu a la tenyera y presentóse al enemigu como xefe supremu de los espíes de Belarmino Tomás.

Yo más bien lu pinto siguiendo a Belarmino como la so propia sombra y embarcando naquella lancha bonitera que los diba llevar hasta la frontera francesa pa terminar volviendo a entrar na España republicana pel puertu de Barcelona. Y que tovía ellí, nel activu Centru Asturianu de la ciudá condal, onde los antiguos dirixentes del Frente Popular d'Asturies entamaron el so últimu serviciu a los sos paisanos, organizando l'apoyu y l'agospiu de los combatientes evadíos, Miracielos tuvo ocasión d'armales muncho y bien gordes o quien sabe de vali-y al so protector Tomás como únicu costín amigu nel que sofitase nes hores de la derrota. Puestos a fabular un final feliz pal felguerín, prestaba imaxinalu acompañando a Belarmino nel so exiliu de México, de pueblu en pueblu, como vendedor ambulante d'alpargates. Y que foi el mesmésimu Miracielos el que, nuna ocasión, al entrar col so compañeru nun chigre de Guanajuato qu'avezaben los refuxaos asturianos y sentir a un grupu d'ellos comentar: “¡Sí, hom ¿alcordáisvos de Belarmino Tomás? ¡Qué castrón! ¡Seguro que ta pegándose la gran vida n'Acapulco colo que nos robó n'Asturies!”. Foi Miracielos el que los dexó petrificaos y ensin ser a gorgutar: “¡Belarmino Tomás ye ésti señor y vende alpargates pelos pueblos conmigo!”.