Maud Gonne

Asomándose a L'Atalaya de Santa Catalina un meudía escampláu más d'una vez se folgó ún na fantasía de qu'ellí a lo fondo la llinia circular del horizonte asomare un dalqué del fulgor verde de la isla d'Irlanda. Más improbable que probable, n'últimu casu casu había que tener bona vista pa ser acolumbrar les llinies borrinoses del contornu de la dulce Erín. Lo que nun admite nenguna dulda ye que basta pecorrer dos o tres milles en dirección este p'alcontrase colos cantiles de La Providencia y un poco más alló los que van enveredando n'abanicu hasta la Punta Tazones pa decatase de qu'esos cantiles, como los de Llanes o los de la rasa occidental, rimen perfectamente colos cantiles de Goleen o Kinsale.

El que tenga imaxinación hestórica, amás de xeográfica, bien puede refocilase en facer rimar ciertos episodios irlandeses con otros asturianos. Los más proclives al mitu pueden remontase al Leabar Gabhala y a la llegada a la Eire anterior a los gaélicos d'aquelles xentes d'alluende'l mar que navegaben en lanches de cueru coles que tovía se gastaben ente los ástures de la costa en tiempos de la Romanidá y perende aculló col alcuñu que los naturales d'Asturies recibíen en Castiella y nes rúes de la villa de Madril: coritos, el mesmu nomatu xentiliciu de los naturales del llugar de Cue, en Llanes. Ye guapo de imaxinar. En cualquier casu los cantiles de la hestoria d'Irlanda que rimen colos de la hestoria asturiana había que dir buscalos más cerca, nes primeres décades del sieglu pasáu, cuando'l fervor revolucionariu de la Pascua dublinesa de 1916 rimó cola famosa Fuelgona de mineros y metalúrxicos de les nuestres cuenques un añu después, y sobremanera cola Comuna revolucionaria d'ochobre del 34.

Va años asistí a una conferencia de Juan Ambóu, l'hestóricu dirixente comunista que tuvo un papel bien destacáu tanto nel 34 como na guerra del 36. Alcuérdome de sentilu confesar que los precedentes hestóricos más cercanos nos que s'inspiraron pa entamar el llevantamientu d'Ochobre, fueran, primero, el más evidente: la Revolución Soviética y en segundu sitiu, la Revuelta irlandesa de 1916. Tiempu después nuna manifestación del Primeru de Mayu, atopéme xusto al llau d'Ambóu y mientres marchaba xunto la xente que lu arrodiaba pudi sentilu cuntar alcordances del 34. Falaba d'un irlandés de la República Llibre que se presentara énte'l Comité Revolucionariu d'Uviéu con un carné del Saor Eire (lliteralmente “Irlanda Llibre”), el grupu armáu que fundaran en 1931 antiguos voluntarios del IRA siguidores de les idees de Connoly y militantes trosquistes. Espresábase nun perfectu español y ufiertóse a trabayar como instructor militar de los revolucionarios asturianos, una materia na qu'afirmaba tener abonda esperiencia. Venía avaláu pola dirección n'Asturies del Bloque Obrero y Campesino y al pesar de la rocea que dalgunos comunistes del PCE amosaben pa colos sos camaraes de tendencia trosquista, aceptáronlu de bon grau y, según Ambou, llegó participar en sinfinidá d'asaltos a los cuarteles de la Guardia d'Asalto y de la Civil, interviniendo nos principales choques coles fuerces gubernamentales.

Más qu'esta noticia de la presencia d'un revolucionariu irlandés n'Ochobre del 34 d'aquella xipla de Juan Ambóu lo que me llamó abondo l'atención foi sentir el so nome: Charlie Regan. Inda pueda ser un nome bien común hasta na Irlanda de güei a mi veníame al calletre la coincidencia con el d'ún de los voluntarios de les Brigaes Internacionales a los que se rinde tributu na célebre balada “¡Viva la Quinta Brigada!”, que popularizaran dende l'americanu Pete Seeger a The Dubliners y Cristhy Morore. Nes últimes estrofes dizse:

This song is a tribute to Frank Ryan
Kit Conway and Dinny Coady too
Peter Daly, Charlie Regan and Hugh Bonar
Though many died I can but name a few...

Esi Charlie Regan que se cita ente Peter Daly y Hugh Bonar ¿pudo ser el mesmu del que falaba Juan Ambóu? Al que-y guste fantasear podía aceptar la coincidencia y figurase, qué sío, qu'una vez aplastáu el movimientu revolucionariu d'ochobre l'irlandés consiguió escapar d'Asturies y que volvió dos años después, enroláu nes Brigaes Internacionales. Posible ye.

Apocayá volví alcontrame con esti nome enguedeyáu nun asuntu que n'apariencia poco tien de ver cola Revolución del 34 y les Brigaes Internacionales. Nun documental de la BBC sobre la mítica revolucionaria irlandesa Maud Gonne mencionábase hasta tres veces -foi les que pudi arrepresar- a un de los sos postreros amantes, al que conoció cuando ella ya cuntaba más de sesenta años y debía siguir siendo una curiosa señora la muyer que tanto fascinara al poeta W.B. Yeats. Yera dalguién trenta años más mozu llamáu Charlie Regan. Si foi el que nos figuramos, que será muncho figurar, non namás sobrevivió a la escamuchina d'Ochobre, tamién a la del gruesu de les Brigaes Internacionales, pos nel documental de la BBC apaecía la vilda del Mayor John MacBride en 1938 presentando les sos memories “A Servant of the Queen” al llau del so fíu Sean MacBride (el fundador d'Amnistía Internacional y Premiu Nobel de la Paz en 1974) y d'un home de mediana edá, mirada recia y sienes canoxes, al que s'identificaba como Charlie Regan.

Seguramente son munches casualidaes pa un solu home y o bien, amás d'un estimable instintu pa sobrevivir a les circunstancies más adverses (incluída una violenta revolución siguida d'una represión inda más xabaz y una guerra civil tan tremenda como la española), cuntaba tamién col don de la ubicuidá, o lo que se pueda colexir ye que falamos polo menos de tres Charlie Regan.

Paseando al debalu de tolos aires conxuraos alrodiu del Elogio del Horizonte de Chillida n'Atalaya de Santa Catalina mientres pensamos no bien que rimen los cantiles d'estes mariñes colos de la verde Erín, un bandu de nubes escomienza asolombrar pasu ente pasu el cielu escampláu del meudía. Son nubes de señaldá y pesar que nos faen remembrar aquel amor desmidíu y nunca correspondíu de William Butler Yeats por Maud Gonne, que llegó a convertise na más dolorienta obsesión del poeta mentantu asistía, como l'intrusu nuna fiesta a la que nun lu convidaran, a la prolixa sucesión d'amantes ente los brazo de la muyer qu'él deseaba y a la que dedicó dellos de los sos más emocionantes versos, como los de “A una prixonera política” o esos otros que nos conmueven inda más si tenemos en cuenta que la vieyera nun foi frenu nengún pa la efusión namoradiza de Maud Gonne nin tiempu de remordimientos pa la so batallada memoria sentimental:

Cuando seas vieya y canoxa, y aseñaldando,
los güeyos se te cierren al calor d'una llariega,
paña esti llibru, lléelo a modo, sueña cola sonce fondura
que tuvieron cuantayá los tos güeyos.



En tolos qu'amaron los tos momentos de dicha
y con amor falsu o verdaderu adoraron la to belleza,
pero hebo un solu home qu'adoró en tí
el to alma caleyera y acariñó como si fueren suyos
los sufrimientos del to rostru inconstante.



Y arrimada al esllendor del fueu en caldia,
remembra atristayada cómo fuxó l'amor
y andó penando pelos cumes de los montes más altos
pa escaecer pa siempre el to rostru ente les estrelles.



El tiempu de la vida y de les pasiones ye siempre como ésti de les riberes atlántiques: tornadizu y cruel. Equí y en Roma, lo mesmo en Xixón qu'en Kinsale, en Quintueles qu'en Dublín.



Busco en Google una de les munches semeyes que recuerden nesta memoria intemporal de les redes tecnolóxiques la estampa de Maud Gonne. Quédome co una de les imaxes que meyor recueyen l'atractivu d'aquella irlandesa, feminista y revolucionara republicana, la muyer lliberal y lliberada que supo da-y vuelta a la so condición del vilda d'un héroe de la Revolución de Pascua pa convertila na d'una apasionada militante de les causes nobles y de los goces que la vida nos ufierta pa recordanos la nuestra condición precaria. Yera roxa, el pelo tan enceso, rebelde y enguedeyao como fueron los díes de la so vida intensa y lonxeva. Foi la Cathleen Ni Holihan na que Yeats quiso encarnar el corazón fogosu y amigu de la llibertá de la so patria. Pasen les nubes escures que traen agua pa estropiar esti día inusitadamente asoleyáu d'a finales de febreru y hai una d'elles que s'asemeya abondo a los bucles enrizaos del revoltosu peináu de Maud Gonne, otra que se pinta a les veríes y al sexu d'una muyer y la que sigue'l so rastru, como una llingua que allampiare xuntase con ella, parezse al perfil d'un home que lleva a cuestes la estrella de la bona suerte y l'aire que les mueve separa les nubes y vuelve xuntales. Maud Gonne, William Butler Yeats, Charlie Regan, nomes que perduren nun requexu de la historia, nunos cuantos poemas verdaderos, en cantu una balada xunta otros cuantos de les mesmes batalles, nomes que pasaron, que pasen como esti bandu de nubes que dientro unes hores, si sigue tirando l'aire nesa dirección, van rimar col cielu qu'anubre norte-noroeste los cantiles igual de verdes y arispios d'Irlanda.