sexta-feira, 15 de fevereiro de 2013

el color de la nubla

¿De qué color ye la nubla?”, pregúnta-y al so maestru un deprendiz de pintor chinu del sieglu XII. Ye de nueche nel taller onde entrambos trabayen. El maestru descuerre la cortina de bambús que los separa de la escuridá esterior y devuélve-y l'enguedeyu al rapaz con otra pregunta: “¿De qué color ye la nueche?”.

Nun fui decatame del verdaderu significáu de la lleción d'esti maestru de pintura de la Dinastía Tang hasta va unos díes. Paseaba colos perros peles vueltes del Rinconín una de les nueches más zarraes en nubla de les que recuerdo tener visto en Xixón. Pel paséu marítimu del Muro, caminando ente 'l llume de les faroles, la borrina amosaba l'hábitu blanquecín qu'aveza gastar de día; sicasí, al otru llau de barandiella metálica, de la banda del mar, la negrura yera total, nin siquier dexaba filtrar un rellumu llonxanu de les lluces del Puertu del Musel o a esta ribera de la badía, l'esllendor de los edificios y faroles de l'Avenida Rufo G. Rendueles. La nubla ensin lluz yera tan escura y prieta como dicen de la boca del llobu.

Alcordéme de les circunstancies nes que se produxo'l naufraxu del Castillo de Salas contra les roques del Cerru Santa Catalina va unos cuantos años, más o menos pel tiempu nel que vine yo a vivir a Xixón. Según el capitán del barcu siniestráu veníen acolumbrando a babor el reflector del Faru de Torres y les lluces del Musel y a estribor los esllendores de la ciudá alrodiu l'Arenal de San Llorenzo. Los instrumentos de navegación y el radar nun yeren a estremar gran cosa por cuenta de les condiciones climatolóxiques y una avería que llevaben arrastrando dende mar adientro. Guiáronse pola so propia visión dende'l castiellu de popa. Delantre d'ellos vieron abrise un vastu campu d'escuridá, nengún rellumu de lluz escentellaba naquel espaciu de negror pel qu'avanzaben el rumbu. Asina s'esfrellaron escontra los roqueros de Santa Catalina. La escuridá aparente yera una engatada de la nubla.

La nueche y la lluvia pertenecen a la mesma especie d'elementos camaleónicos que la nubla. Por elles mesmes nun tienen un color propiu, limítense a adoptar los tonos que-yos empresten la lluz natural o eléctrica. Puede comprebase fácil de la que sacamos fotografíes nocturnes. Ensin los colores emprestaos de les lluces de los semáforos, les faroles, los faros de los coches, los lletreros lluminosos o l'espeyu de la lluvia, prollongando y derritiendo esos rellumes, malpenes seríemos a retratar otro que la nada o como muncho la escuridá sorprendida por un flash.

La nueche, la lluvia, la nubla, como la seronda, el tapecer o el riscar, la belleza d'un cantil o d'una campera, la belleza d'un cuerpu mozu o d'una fonte, son invenciones de la nuestra mirada y del nuestru pensamientu. Como la vida y la muerte, que los animales nun conocen nin roceen de la mesma manera que nós, con emoción, fervor, desliendu. Escribiólo Yeats: la muerte (y la vida) ye una invención del ser humanu.

¿De qué color ye la nubla?”, pregunta-y deprendiz d'artista al so maestru nuna antigua nave industrial tresformada en llaboratoriu de formes plástiques contemporánees: “Del color de los espeyos y les fotografíes, del color de les películes de cine y de les imáxenes dixitales que remanecen na pantalla del to ordenador”, responderá-y seguramente'l maestru, porque, a diferencia de los maestros chinos d'antiguamente, los tutores artísticos contemporáneos gusten de lo específico y refuguen de les simplificaciones. Nun ye que tean desacertaos o que s'estremen de lo esacto. Pero cuésta-yos responder a lo llano -ye'l signu de los tiempos-: “Del color de la to mirada”.

Sem comentários:

Enviar um comentário