De nenos xugábemos
a pasar la mano per elles
sin ortiganos.
Adulces
deprendimos
qu'en tardes de muga
les sos fueyes
ortiguen menos,
tamién cuando
les toques coles manes moyaes.
Un xuegu aburríu,
de cobardes.
La preba de verdá
yera arrimar los deos,
la mano entera,
ensin eses macanes,
sentir el rozu de la ortiga
(aquellos pelucos como
los que nos empezaben salir en bigote)
y aguantar mecha
sin apistañar.
Llamábamos-y a esi xuegu:
"Cariciar la culiebra"
y ortigar, claro, ortigábamonos.
El trucu consistía en disimulalo
énte los otros
aparentando
una fachendosa inmunidá.
Yera asina. Poca cosa.
Refugaya pal antropólogu
o pal mistificador
qué busquen dalgo más
nesos ritos d'iniciación.
Nun nos preparábemos pa ser guerreros bravos
nin paisanos d'una pieza,
nin siquier pa ser quien a finxir valor
ente'l dolor, el mieu o l'adversidá,
naquellos xuegos
simplemente deprendíemos
a ser como los demás,
a guarecenos del peligru col camuflaxe
más eficaz de toos:
el de pasar desapercibíos.
Sem comentários:
Enviar um comentário