terça-feira, 19 de junho de 2012

comida basoria

Güei vi a un home comiendo directamente d'un contenedor de basoria. Con una mano tenía pola tapa y cola otra pañaba a puñaos restos de comida qu'encarrilaba a la boca. Como ye natural nun m'aparé a reparar pa la escena, sicasí de la que pasaba paecióme entever que se trataba d'unos cachos de pizza y un mecigayu de patates frites, seguramente entafarraes de ketchup. Comíalo asina, a puñaos, esfozando na mano y chupando los deos. Tenía la cabeza guardada embaxo un capiruchu y les manes negres, nun sé si pol color del so piel o del color puru de la misera. Vilo esta mesma nueche, de la que pasaba colos perros al llau de la urbanización d'adosaos d'El Rinconín, equí en Xixón.

Hasta agora tenía visto -vese casi tolos díes- a xente qu'escarabica nos contenedores de basoria xunta dalgún supermercáu recoyendo productos caducaos y guardándolos en bolses o carros de la compra, sicasí nunca m'atopara con una escena tan atroz como la d'esta nueche. En pueblos pequeños onde ye corriente la presencia de perros ensin amu peles cais, bien de veces los viera revolviendo y esfocicando na basoria. Víalos y quedába-y a ún el corazón malagustu en comparando la vida d'esos perros caleyeros cola de los nuestros, avezaos a compartir un daqué del nuestru platu o el confortu del nuestru sofá y hasta la nuestra cama. La impresión d'acolumbrar a un ser humanu esfocicando na basoria nun ye que dexe un malagustu en corazón ye que te lu arranca del pechu y déxate dafechu xeláu, ensin sangre, nin alma. Sintiéramos a los nuestros pás falamos d'aquellos probes que vinieran a les cuenques d'Estremadura, d'Andalucía, de Portugal, a la busca un xornal  y qu'acababen arramplando coles algarrobes destinaes a les mules de los pozos mineros, de los gallegos, de los que se cantaba: cuando van a trabayar/lleven la barriga llena/de pataques sin pelar. Más d'una vez tien visto ún nel bayurosu comedor d'una sidrería a dalguna persona mayor, del tiempu de los nuestros padres, recoyer del suelu un chuscu de pan que cayera y besalu como cosa sagrao. Sicasí paez que nun tábemos preparaos pa ver nos nuestros díes a un semeyante procurando alimentu na basoria.

Un chistosu d'estos tiempos, un d'esos artistes multidisciplinares contemporáneos que s'esponen a ellos mesmos y a les sos ocurrencies, a ser posible tremendamente tresgresores, por dalgo más qu'un puñáu de dólares, hubiere alcontrao na escena d'esta nueche el leit motiv d'una perfomance a la que nun-y facía falta añadir detalle. El títulu diba veni-y servíu en bandexa de plata, si se nos permite'l chiste malu, puestos a facer chistes de duldosa gracia: "Comida basoria" y hasta podía enchipase l'artista d'ellaborar un ácidu y demoledor discursu escontra los escesos de la cultura capitalista. Nada más evidente qu'un probe esfocicando nos restos d'una pizza y d'unes chips entafarraes de ketchup nun contenedor de basoria. Nada más orixinal.

Los que nos criamos nesi otru mundu onde'l pan y toles coses de comer yeren sagraos, non porque les bendiciera'l cielu, sinón la tierra, el trabayu, onde los probes nun yeren apestaos sinón vecinos de la mesma comunidá que les circunstancies de la vida echaran a la caleya y polo tanto xente cola que compartir lo que se tien y a la qu'aidar porque la suerte ye soltera o vilda, como diz el cantar, nunca moza casadera... Nós, a nós, enxamás nos diben topar aplaudiendo al artista multidisciplinar contemporáneu autor de la perfomance titulada "Comida basoria". Llamaríamos-y l'atención coles nuestres peores maneres, llamaríamos-y sinvergoña, caradura, fíu de naide, infame...por dicir el que nunca pasó fame. En cierto naide, nin siquier ún tenía derechu a falar del home que comía directamente d'un contenedor de basoria ensin pidí-y permisu, ensin pidí-y perdón por aceptar como un mal inevitable esta mierda de mundu nel que vivimos.

Sem comentários:

Enviar um comentário