"Ye tan guapu que repuna", dicíen les muyeres en mio casa de ciertu galán de cine o cantante de moda, enforma perfectu pa ser de carne y güesu. Podía dicise otro tanto d'eses palabres con vocación de lletreru lluminosu y que rinchen nos oyíos cuando se pronuncien con un aquello d'énfasi.
La palabra alegría, por exemplo. Pertenez a la categoría de los vocables comunes colos que se filvanaron bien de cantares y versos populares o la poética d'autores tan delicaos como Taine, Emily Dickinson, Rosalía, Eugenio de Andrade. Una palabra como ríu, fonte, alma, lluna, trébole, reitán, soledá. Palabres humildes y verdaderes coles que se puede trazar una elexía sublime lo mesmo qu'una solemne cursilada.
Sicasí nenguna d'eses palabres elementales tolera la mayúscula o la voz alta, ye como si fueren inmunes a ello: ¿quién puede gritar o escribir en capitulares de diariu deportivu la palabra lluna, soledá o alma, a nun ser una persona mui desquiciada?. A l'alegría, sicasí, paez que-y pasó como a eses mocines o mocinos curiosinos a los qu'a fuerza de sentir emponderamientos al so pasu dende bien nuevos, la guapura subióse-yos a la mollera y avezáronse a querer resaltala inda más con toa triba d'artificios: maquillaxe, atildamientu, tontería...
Probe alegría. Da un poco de pena esa criatura que lo tenía too p'agradar a cualaquier ser mortal y que por mor del so enclín al perifollu y a la fachenda quedó sola.
Pablo, quedó sola pero a munchos nos presta visitar la so casa.
ResponderEliminar