sange negro

De toles coses que se vieron y se sintieron estos díes nos medios de comunicación a propósitu del conflictu mineru la que más m'impresionó fue la imaxe d'un rapaz que s'acercaba a una cámara de televisión pa declarar: "Aquí tenemos toos la sangre negra". Nun sé si la frase yera esactamente esa o: "Nosotros tenemos toos la sangre negra", "Los mineros tenemos toos la sangre negra"... Una declaración en cualquier casu d'eses que nun caen embaxo a naide.

Hai frases que dan abondo pa pensar porque namás pueden tener un significáu, otres como esta son fondes pola diversidá de significaos que proponen. El rapaz podía tar a falar del sentimientu de comunidá col que s'identifica tola xente de les cuenques al través de la minería o mesmo en sentíu más restrinxíu a la solidaridá que xune a tolos trabayadores del carbón, a la "sangre negra" que toos ellos comparten pol so contactu físicu diariu col mineral. Mesmo podía tar a falar de que los mineros teníen el sangre negro d'indignación y rabia o de la necesaria unidá de toos ellos per enriba d'estratexes sindicales estremaes o de les sos circunstancies particulares. 

Puestos a escurrir, quién sabe si tuviere a reivindicar la ferocidá combativa de los mineros difundida pola propaganda de los sos enemigos de clase dende la revolución del 34 y caltenida mientres la guerra civil y la postguerra pa xustificar la represión contra la xente de les cuenques. Inda a primeros de los años sesenta, en delles zones del estáu, pervivía nel imaxinariu colectivu la estampa del mineru como una especie de terrorista desalmáu, al que poco-y faltaba pa completar el so equipu de demoniu dinamiteru qu'un par de cuernos y un rabu, según remembren inda güei dellos de los trabayadores desterraos por mor de la segunda fuelga del 62. Aquellos mostruos bien podíen tener el sangre negro. 


Cualquier d'estos significaos y sobremanera toos en xunto faen grande a esa frase soltada por un mineru mozu a una cámara de televisión ente les barricaes que cortaben una de les principales víes de tránsitu del país. Fuera d'equí de xuro sonara enigmática, surrealista, casi una suerte de greguería a lo Ramón Gómez de la Serna. Los d'equí entendímosla toos a la primera. 


Como la rapacería que se crió nos barrios republicanos de Derry y otros puntos calientes del Ulster dende los años sesenta, los que nacimos na Cuenca tamos familiarizaos dende bien nenos cola estampa de les fuerces antidisturbios escorriendo a los nuestros familiares o vecinos, a los cascos, los escudos, los toletes, les pelotes de goma y los botes de fumo. Eso de ver a la Policía (o a la Guardia Civil) non como nel restu del mundu y nes películes y series de televisión persiguiendo a los malos, sinón a paisanos corrientes, xente a la que conocíemos de tola vida, a los nuestros, mesmo a nós si nos travesábemos nuna d'eses escorribandes, eso tien de formar nún cierta concepción de la realidá. Cría ciertos humores negros nel sangre d'ún, talo figuraben los griegos. Bilis, calter foscu, tastu permanente na boca de tar mordigañando una cáscara amarga. 

El sangre negro que nos fierve nes venes cuando vemos a unos puntos d'uniforme y pertrechaos con hermanu equipamientu al de Robocop (seguramente bellísimes persones, escelentes maríos, mozos y padres de familia exemplares, trabayadores malpagaos y víctimes de les arbitrariedaes y abusos de la superioridá xerárquico, xente corriente como nós...) escorriendo per un prau arriba a unos cuantos rapazos de los nuestros, vecinos, parientes, amigos... Fierve nes venes esi sangre que ye'l de los malos humores, el que podrez hasta'l corazón más llimpiu y el calletre más cabal. Y inda racionalizando les coses, sabiendo bien qu'esos Robocops nun son l'enemigu y simplemente faen el so trabayu, porque dalguién tien de facer esi trabayu: si se corta una carretera, abrir el pasu; si se dispara contra ellos, anque sean voladores, responder... El nuestru sangre negro siente'l llamáu de ponese na banda de los que cuerren monte arriba lluchando pol únicu futuru que-yos queda, el que-yos nieguen.