Hai
formes y colores de la realidá qu'alcuando ciéguennos.
Remembrábalo Borges a propósitu de la so propia
ceguera: contra lo que pensamos la mayoridá de los videntes,
el qu'enceguez nun se somorguia del too nun abismu d'escuridá
sinón nuna paulatina perda de formes y colores na que la lluz
sigue esistiendo, cada vez más peñerada nun mar de
sombres y niebla. L'autor del Poema de los Dones agradecía-y
al so destín irrefugable d'home ciegu el poder siguir
estremando d'ente tolos colores perdíos el color mariellu, que
yera pa Borges, l'oro de los tigres.
Va
años tuvi la oportunidá d'acompañar a un rapaz
ciegu na so primer esperiencia de subise a un caballu. Enantes de que
lu aidáramos a montar na siella, con un pie nel estribu, el
rapaz carició como si fuere una reliquia preciosa el pescuezu
y les crines del animal. Arrimó los deos al focicu del caballu
y pudo sentir el so aliendu cáledu tan cerca, que, confesó,
casi lu quemaba. Una vez montáu, la muyer que lu convidara a
vivir esa esperiencia, preguntó-y qué sensación
tenía y él contestó qu'ellí enriba
sentíase como un rei antigu, percibía la magna
corporalidad del caballu y l'altura de sabese una migaya más
poderosu xubíu al so llombu.
Aquel
yera ún de los caballos más mansos y nobles del
picaderu, taba avezáu a enveredar les mesmes rutes de monte
dende diba unos cuantos años y n'ocasiones, los guíes
encamentáben-ylu a los xinetes novatos asegurando qu'a Grifón
-asina yera'l nome d'aquel percherón ruciu de potentes remos y
una cachaza d'elefante- podía montalu un ciegu y tar fixu de
que nengún peligru diba correr enriba d'él nin seña
de que l'animal se desviara del so camín avezáu. Agora
yera'l casu de comprobalo.
Depués
de que lu arropamos toos colos nuestros conseyos ya instrucciones de
cómo tener poles riendes, cómo caltener los pies nos
estribos y cómo facer que'l caballu se punxere en marcha con
dos seles calcañaes y cómo facer que parara apertándo-y
les encuestes colos músculos ximielgos de les piernes...Toes
eses coses que se-y encamienten al principiante, el rapaz consideró
que ya yera la hora de poner a Grifón en movimientu. De mano
llevábalu un guía del ramal, pero a mididia que'l
xinete se diba sintiendo más seguru, escomenzó a pidir
que lu dexaran llevar el caballu a él solu. El guía nun
yera partidariu y tampoco otros miembros de la espedición,
tentaron unos con meyores o peores razones desaconseyáilo. A
la fin, la persistencia del rapaz, llogró que'l guía-y
allegare les riendes y lu instruyera de cómo llevales na
posición más afayadiza y segura.
El
veteranu Grifón nun dexó mal a aquellos que lu
recomendaben como la montura perfecta hasta pa una persona ciega.
Obedecía dócil al so xinete, inda a les veces
remontaba'l focicu bufando como pa encamenta-y que siguiera los
conseyos de los más espertos y nun-y tuviera les riendes nin
muncho sueltes nin muncho arrepresaes.
“Agora
sí que me siento como un auténticu rei de los
d'antiguamente”, saltó el rapaz, después de probar
que Grifón paraba'l pasu de la que él-y lo pidía
cola fuerza de los músculos ximielgos y de que prosiguía
la marcha con namás roza-y el vientre colos calcaños.
Miré al rapaz d'esgüeyu y noté-y la satisfacción
allumando-y la cara. “Entiendo -dixo, alzando la tiesta, como
falando pal vientu- por qué aquellos reis se consideraben tan
poderosos nuna batalla montando al meyor caballu del so exércitu”.
Enfilábamos
una campera llana pela qu'avezábemos poner los nuestros
caballos al galope hasta algamar una cuesta non mui pindia al otru
llau de la escamplada. Los que díbemos galopar, esta vez
dexamos que pasaren los nuestros compañeros de ruta pa quedar
al final de la filera y esperar ende a que los otros s'allonxaran
unos cientos de metros entantes d'espoliar a los animales. El rapaz
ciegu quedó l'últimu de los que siguieron de llargo al
pasu. Diba enchipáu y derechu, con una postura que nos plasmó
de lo correcta y afayadiza qu'aparentaba, como la d'un xinete
espertu. Dalguién comentó que de cierto montaba como ún
d'aquellos reis antigüos de los que falara. Vimos al grupu
adelantráu emprimar la cuesta del fondo la llanada y
escalcañamos a los caballos pa galopar hasta ellí. Foi
una carrera curtia, de non más de quinientos metros, pero bien
intensa y prestosa... En refrenando a los animales, cerca ya de los
que nos precedíen, plasmamos toos al ver que Grifón -el
cachazudu y lentu Grifón- de sópitu volaba, arrancara a
galopar monte arriba como si tuviera bruques en caldia nos cascos,
col rapaz ciegu al llombu. El guía de la ruta salió
galopando como un rayu tres d'él y dellos de nós
xuntámonos a la persecución tres el rastru vertixinosu
del caballu desbocáu...A lo llonxe acolumbrábamos al
xinete, firme y aferráu coles piernes a les encuestes de
Grifón, col cuerpu enclináu hacia alantre pa enfrontar
la cuesta más seguru, igual qu'ún verdaderu caballista
bien tralláu en desboques y carreres de cintes...No alto de la
cuesta, no más pindio, Grifón foi perdiendo fuelle y
acabó retrotando como si les pates-y pesaran muncho pa
terminar volviendo al pasu que yera corriente nél, cansín
y escadriláu, como'l de los campesinos vieyos que siguen el
camín de la vida mientres haya pación que pradiar y
pataques que sayar. El xinete paecía agradece-y la refrenada
cariciándo-y el pescuezu y les crines, cola mesma serenidá
d'un jockey que felicita al so crack en terminando con ésitu
una carrera.
De
vuelta al picaderu, el rapaz ciegu al sentir ende la voz de l'amiga
que lu convidara montar, baxó de Grifón con muncha
seguridá, carició-y una vez más el pescuezu y la
tiesta. Abrazó a la muyer, muertu de risa, ríase a
gargayaes mientres l'abrazaba y la besaba nos llabios con chuchos
seles y fondos.
-
Entós ¿qué tal? -preguntó-y ella.
El
rapaz ciegu volvióse, buscando col instintu, l'oyíu,
l'olfatu, tolos sentíos que tenía bien sollertes, a los
que lu acompañáramos n'aventura.
-
¡Volé! ¡Nun sabes que volé! -dixo, escitáu,
asonsañando colos brazos dos ales planeando- ¡Volé
nel caballu! ¡Foi como si-y salieren ales y me llevara pel
aire! Y sentí dalgo qu'enxamás de la vida hasta agora
sintiera...Mientres volaba d'a caballu la lluz nun me mancaba nos
güeyos, al revés: yera igual que'l falagu frescu del
vientu na cara, una caricia tan guapa que per un momentu tuvi la
impresión de que veía...
Y el
nuestru compañeru de ruta encaróse hacia onde tábemos
nós desembridando a los caballos con una sonrisa cómpliz
y un escamplor encesu nos güeyos como si en verdá nos
mirara.
Sem comentários:
Enviar um comentário