la rebusca

como si nada

celebración

Sabe la llingua
el surcu 
fondu
de la sede
y la lluz
que moya
les buelgues
seques
de l'alegría


sabe
el tastu acedu
de los díes
que salva
un besu
d'escitada
celebración

en qué matu
s'escuende
la culiebra
blanca
de la bona suerte


y que perdonen
l'olvidu
y la podredume
los cuerpos 
amigos
que'l sol 
alcuando escaleció.

la casa de los muertos

palabres de ñeve

el tiempu de les colleches perdíes

Je me souviens

Nueches del hibiernu del 85,
cais allumaes pola lluz secreto
de les confidencies y la vida
qu'inda alendaba 
en dos o tres bares abiertos,
les nuestres palabres
una foguera
a la qu'arrimar les manes
y amosar
una regaya del corazón,
los nuestros rancores
tovía enemigos mui llonxanos,


cais de La Felguera
embaxo un llátigu d'orpín,

panteres del recuerdu
na mirada miope y cabal
d'Alberto Vega,

un home solu cruza
colos brazos n'alto
ríos de marihuana,
va buscando
un requexu afayadizu
onde dalguién lu quiera crucificar,

ríos de rises
de Lauro, Niebla, Sanmi, Yuri...
            Ubi sunt
Quique desarmando la bolera
de rodiellles na cera
suplicando anfetamines
a la lluna,
el tactu duce
de les tetes de Y.,


Je me souviens
les cais enceses
del hibiernu del 85
na Felguera,
alcuérdome bien,
sigue a respigame
el tactu duce
de les tetes de Y.,
l'agullíu remotu del llobu
alló nel monte.

povisa nos güeyos

Sabía que la povisa
ye frío, 
alcuando
el so pesu leve
xelóme los güeyos,
cególos
col so deu
espolvoriáu
de diamante,

povisa frío,
conozo bien
el so aliendu
de muertu
nos párpagos
trémoles,


llonxe
del agua
que pinga los praos
y les guedeyes arispies
del monte,
alluende
les resquiebres húmedes
del ríu y les zreces
nel piel del aire,

sé qué nada
rescalva la povisa frío,
que xela y manca
como diamante
espolvoriao
nes niñines
de los güeyos,
como plombo delío
nuna fería en carnes.



 

emigración

l'esconderite del fríu

S

Escuéndeste na lluz,
en zones ocultes
de los díes
que dexa correr
la ciudá
como un ríu
ente les rieres
del silenciu,

guárdeste
dientro una lluriga
allumada día y nueche
col escamplor
de tolos pasos
perdíos
a la busca 
un camín
nel qu'esborriar
les buelgues
pasaes y toles del futuru,
les que pudieren delatar
el to rastru como la babaya
d'un llimiagu,

escuéndeste
nel bardial
como un guxán de lluz
vedáu a la vista
de los caminantes,
como un llumeral
que namás
siente arder
alló alluende
no cimero
el llobu,

después de tantos años,
después de tantes tormentes
allumes como
una estrella de xelu
yes una foguera
que nun escalienta
nengunes manes,
nengún rancor.