otru mundu d'acaballu

Alcuando tien la sensación ún de que nun ye lo que se diz un home del so tiempu. Nun sé, pongo por casu, paezme raro qu'haya xente quien a pagar una cantidá estraordinaria de miles de dólares por viaxar nes primeres escursiones turístiques al espaciu esterior. Como ye sabío d'abenayá hai un selectu garrapiellu de multimillonarios snobs col billete compráu pal primer vuelu comercial a eses llendes qu'hasta agora namás avezaron los astronautes d'oficiu y aquella probe perrina caleyera de l'antigua Unión Soviética llamada Laika. 

Ún que siente revolvese'l botiellu en subiendo a una noria y que pieslla los güeyos, como les avestruces cuando escuenden el pescuezu nun furacu, de la que despega nel asientu d'un avión, cuida qu'eso de salir aventáu más alló de la órbita terrestre tien de ser una esperiencia nada agradable, sobremanera pa los qu'amás de pánicu a les altures tenemos la tensión un poco alto. Por eso se ve ún como un home un pingu descolocáu del so tiempu. De tener una fortuna como la d'esos millonarionos escéntricos con reserva nos primeros vuelos del turismu espacial, marafundiáralo de bona gana por dalgo qu'igual nun pinta d'esti sieglu, como l'espíritu d'ún, -digo yo- y que ye lo que más me presta facer na vida, arriendes de folgar, por poder desplazame pel mundu, per Xixón, pelos sos alreores d'acaballu.

Envidio y célome de los Amish americanos, colos sos machos, les sos egues y les sos xarrés, tamién del poeta Miguel Allende, que dispón d'una bona eguada propio p'andar a monte na so Sangri-Lá de Canzana. Préstame guiar en coche, volar n'avión después del forfugu del despegue y enantes del forfugón d'aterrizar, el tren paezme ideal pa viaxar lleendo y mirando'l país que pasa tres les ventanes, los ferrys son un tresporte magnificu pa llegar o marchar de les ciudaes o pa avagar el tiempu si amás son de baldre como los que van de Manhattan a Staten Island, les bicicletes, les motos, los monopatines, les esperances, cualaquier vehículu que valga pa facer camín abúltame estupendu y afayadizu. Sicasí, de ser un héroe con derechu a dexar llantada una sentencia en remembranza del so pasu pel mundu, en vez del gris ciudadanu d'ún país de borrina y orpín y políticos mediocremente ferruñosos que-y toca ser, dixera que lo trocaba too, como'l rei de la fábula hestoriada, pol llombu gustosu d'un caballu.

Dáime un caballu pa montar y un sistema onde se pueda escoyer en llibertá a los que más xustamente se cree que pueden gobernar o decidir el destín de la comunidá onde ún vive y qu'estos tengan les mesmes oportunidaes de salir elexíos que toos esos tres o cuatro o cinco trafullos abellugaos y financiaos pol Gran Poder. Hai fines de selmana soleyeros de la primavera moza na qu'ún namás allampia por un sistema xustu y proporcináu, una democracia real como la que suañaba Walt Whitman nos sos versos y un caballu col que poder correr a galope los cinco y pico kilometros del Sablón de Bayas, como aquel atapecer d'una primavera de nun va tanto, al llombu de Cimarrón, con Mercedes y una amiga, (ún ye'l que galopa en centru),  mientres los cascos de los caballos chiscábennos de mar o yera'l mar el que nos chiscaba. 

Un atapecer perfectu pa un mundu onde paecía que too yera posible, mesmo una democracia, que nun fuere esi abusu de la estadística, que dicía Borges, onde los fatos nun fueran tan fatos o siéndolo tanto despistárense y tracamundiárense al votar y, a falta d'una llexislación electoral dafechu equitativa, los resultaos se repartieren o s'esfaragullasen pa los partíos del Sistema y nun fueren tan desastrosos pa esta tierra como los que se barrunten irrefugables. De cierto paez poco probable que sucedan estes coses más alló del deséu, como lo de tener corte con caballería embaxo casa y que seya llunes y pueda ún salir al trotín con un palu entafarráu d'esquistu y fueu a quemar tolo que nun-y gusta d'esti mundu.