pax, honor

 

Esti domingu visité con unos amigos el sitiu onde reposen los restos que s'atoparon de les cerca de tres mil persones asesinaes polos facistes dende'l mesmu día de la so llegada a Xixón hasta bien entrada la década de los cuarenta del sieglu pasáu. Cuatro foses comunes dispuestes en cruz y una inscripción que reza "PAX" y "HONOR" recuerden nel cementeriu de Ciares que la memoria hestórica ye dalgo más qu'un mansuñáu sintagma, puestu a veces na boca de los que más teníen de callar. A pocos metros, un muriu onde nunca falten flores fresques o musties, miembra en diverses plaques qu'esi fue'l paredón onde s'executó a la mayoría de les víctimes enterraes nes foses comunes. Al otru llau del muriu, les sebes y los praos estiéndense hasta un horizón de montes azulaos pol contralluz del sol tímidu de xinero y nubes enforma cerca de la tierra: elli nun cuesta figurase, al que tenga dalgo de sensiblidá hacia'l dolor ayenu, lo que pudieron sentir esos miles d'homes y muyeres nel amanecerín del so últimu día; lo que en cierto sentiría aquella xente, que güei namás son un nome y un puñáu de güesos, namás ellos podíen cuntalo dende una improbable resquiebra del so silenciu.

Hailos, amigos de les grandes palabres, que dicen de los muertos que nun tán nos cementerios, qu'ellí namás hai restos, lo que queda d'un cadabre, pasáu el tiempu, y que namás perduren nel recuerdu de los que siguen pensando nellos. A eso y a falta d'otres certeces, ún namás podía contraponer la so propia esperiencia: equí, nes foses comunes de Ciares, nel paredón del Sucu, puede sentise con tol alma que los muertos sí tán onde morrieron y onde los enterraron. Ye la mesma emoción qu'un siente cada vez que visita la tumba de so padre en Sama, ellí nuna de les fileres más altes de nichos d'esti cementeriu que se confunde col monte y coles castañales qu'arrodien los sos murios, acolúmbrense tolos paisaxes que mio padre vivió nel so llugar natal: La Torre Baxo, onde nació, el parque donde paseaba colos sos amigos Horacio y Pedro Mario y onde empezó cortexar a mio madre, les oficines de la Unión Hullera onde trabayó, los altos de l'Artosa, Les Pieces, Los Mayaos que percorrimos xuntos tantes tardes de la mio infancia, la ilesia onde un cura de sopa y cuyar ofició el so funeral cola mesma falta de compasión cola que miraba el reló después nel cementeriu mientres nos desfacíamos nel dolor...La emoción respigante qu'ún sintió en Nueva York, na Zona Cero, énte los mensaxes de despidida llantaos nun panel de plástico y los vendedores de souvenires del horror. 

 

Dalgo asemeyao pasa colos cantares de guerra. Raramente llogren emocionanos los himnos victoriosos. Los únicos cantares de guerra qu'emocionen son los que falen de la derrota, los himnos en recordanza de los muertos d'una guerra que se perdió. Pocos cantares llogren emocionalu a ún más que "Viva la Quinta Brigada", esa vieya balada n'alcordanza de los voluntarios irlandeses que llucharon contra'l facismu na guerra civil española. Na furmosa lletra d'esi cantar miémbrense los nomes de dalgunos d'ellos: el comandante Fran Ryan; el pastor Bob Hillard, del que se diz que salió de la so ilesia de Derry pa embarcar dende Killarny y altravesar los Pirineos pa combatir y morrer n'España; de Tommy Woods, que vieno dende Derry a morrer nun llugarín de Córdoba, Villa del Río, con malpenes diecisiete años; de Charlie Regan, Danny Boyle, Liam Tomilson, Jack Malty, Frank Conroy, Jim Foley, Tommy Fox, Dick O'Neill. De nun esistir esta balada, compuesta por otru voluntariu irlandés que sobrevivió y diba convertise nun célebre músicu folk de la República Llibre, naide diba alcordase d'esos nomes, pantasmes qu'un día fueron mozos col corazón encesu de valor y idees nobles. 

Sentimos les sos voces ancestrales clamiando contra l'escaezu tolos díes. Nun clamien venganza nin a llamar dende'l so sangre a más sangre. Malpenes clamien por eses dos divises que se llevanten enriba les foses comunes del cementeriu de Ciares: "PAX" Y "HONOR", descansu y recuerdu d'unes vides honorables. 

Güei vimos en tolos noticieros al xuez Garzón sentáu nel banquiellu de los acusaos na primer de la serie de causes qu'abrieron contra él los que nun son a perdona-y que metiere'l so fociu n'asuntos que meyor nun furgar nellos. Los que conocen la so trayectoria profesional dicen que non siempre foi un xuez exemplar: qu'instruyó de manera trafalla sumarios que quedaron en nada, que-y gustaben les cámares y que nun amosaba abondo interés cuando un deteníu, xeneralmente por causa de terrorismu, manifestába-y haber sío torturáu. De xuro dalgo de too eso llevará Baltasar Garzón al llombu de la so carrera como instructor de l'Audiencia Nacional. Lo que naide-y puede negar ye que foi l'únicu miembru de la xudicatura que nesti estáu s'atrevió a considerar los asesinatos y despaiciones del franquismu como crímenes contra la humanidá y que como talos nun podíen quedar prescritos. Namás por eso, fáiseme, que cualaquier ciudadanu sensible a la xusticia, había tar al so llau. Los muertos merecen respetu y nun fai falta creyer en pantasmes pa decatase de que namás descansen en paz los qu'algamen que'l so nome conoza la xusticia y l'honor, que nun s'escaeza.