terça-feira, 24 de setembro de 2013

pasu a nivel



















PASU A NIVEL

Alcuérdome de cuando la vida yera un pasu a nivel,
el tren qu’altravesaba la carretera xeneral a deshores,
ensin esperar la barrera, neciu nel so camín,
-¡que frenaren los coches y les camionetes de carbón!-
el viaxe nun podía interrumpise, había llegar al destín ,
inda truñare per delantre a un cientu de Lexones de Roma.

Agora m’alcuerdo, bien m’alcuerdo, cuando nos conocimos
a piques de cruzar per aquel pasu a nivel, a deshores.
Yéramos de la estirpe del tren, poco nos importaba
que se cruzaren nos nuestros pasos coches o camionetes
cargaes de carbón, un cientu de Lexones de Roma.
El nuestru viaxe nun lu interrumpía nadie, había llegar
a dayures o a niundes, a cualquier llugar llonxe
d’un destín que nin tú nin yo queríemos siguir.

Alcuérdome perbién, claro que m’alcuerdo, amigu,
de la última vez que nos vimos xunta’l pasu a nivel.
Yo marchaba pa otru llugar, dexaba ende nada
y unes poques complicidaes qu’inda perduren,
tú bien lluego colaste pal llugar del que naide vuelve.
Despidímonos xunta’l pasu a nivel, ensin saber
que diba ser la última vez na que tábemos xuntos.

Pasaron munchos trenes de magar, tantos trenes
que seríen llevar per delantre un cientu de cientos
de Lexones de Roma, un ciento de cientos de coches
y camionetes cargaes de carbón, un cientu de trenes
colos qu’esfocicaren viniendo pela mesma vía a escontra.

La vida yera un pasu a nivel, sabíamoslo entrambos.
Baxó y baltióte la barrera a ti más lluego qu’a mi,
asina foi la cosa. Pasó’l tiempu, nun echo tres d’ello.
Miembro namás los díes felices que compartimos,
les nueches llargues col trébole de la bona suerte
ente les manes, enfotaos en qu’enxamás terminaran.

Como Leonard Cohen remembrando a Janis Joplin
nel Hotel Chelsea –esi cantar que tanto t’emocionaba-
nun pienso en ti abondo, namás en ciertes nueches,
xunta’l pasu a nivel de la vida desafayadizo,
mientres probecen les hores, l’enfastiu, los trenes,
como si nada los entainara a ser veloces, fugaces.
























Sem comentários:

Enviar um comentário