que
trabayó como revisor d’aquellos trenes. Inevitablemente vienme a l’alcordanza
el maquinista de “Wait a minute!”, una de les tres hestories que componen “The
Rising of de Moon” de John Ford. El so
auditoriu atiende pa él colos güeyos encesos de los qu’escuchen cuentos al fueu
d’un llar.
-
Una vez –cuenta, recreándose nes pauses de la so narración-, veníamos nel tren
d’Oviéu y acabante salir de la estación de Sama, de la que la máquina emprimó a
carburar y garrar velocidá, vi a una vieyina, vistía de negro de los pies al
pañuelu de la cabeza, que se llevantaba del so asientu y enfilaba hasta una puerta del vagón. Diba falucando sola y paecióme que nun debía de tar mui
bien de la cabeza. Llevaba un paxellu na mano tapáu con un pañolón negru igual
que’l que llevaba cubriendo-y el pelo. Entós, cerca del pasu nivel de la Casa
Nueva y ensin qu’a mi me diere tiempo a facer nada, la muyerina abrió, con una
fuerza fuera de lo corriente, la puerta de corredera del coche y tiróse a la
vía. Instintivamente tiré del frenu d’emerxencia y después d’unos cuantos
metros el tren aparó con un topetazu tan bárbaru que llegué perder l’equilibriu
y caer en suelu’l vagón. A lo llonxe sentía les voces del maquinista y otres voces
que nun fui reconocer. Baxé del tren
como fui quien y entós pudi ver aquel escarniu: delantre la máquina había un
home partíu en dos y col craniu achapláu ente los fierros restorcíos d’una
bicicleta…
…El
maquinista y unos cuantos paisanos que debíen pasar per ellí echábense les
manes a la cabeza alrodiu del muertu. Yo buscaba
pela vía y los sos alredores a la muyerina que se tirara del tren o a lo que
quedara d’ella. Miré embaxo los vagones, ún per ún, por si quedara’l so cuerpu atrapáu
ente les ruedes y los amortiguadores. Per dayures fui atopar rastru d’ella.
Después vinieron la Guardia Civil y los municipales. Conté-yos el casu, cómo
sucediera too enantes del accidente y tuvimos toos la tarde entera buscando y
rebuscando per tolos alredores de la vía, ensin dar colos restos de la
muyerina. Los guardies y hasta’l mio compañeru el maquinista llegaron a duldar
de lo que-yos contara. Dicíen que nun yera posible que dalguién, por muncho qu’un
tren lu estrizara, nun dexara nengún restu. Y yera inda más imposible que la
supuesta muyerina si se tirara del tren fuera quien a marchar del sitiu polos
sos propios pies y ensin que nadie la viera…
….Pasó bien de tiempu dende aquello. Malpenes llevaba un par d’años de revisor. El mio
compañeru, el maquinista, otros compañeros, la muyer, los mios fíos, siempre m’aconseyaron
que lo dexara pa prau y que nun echara más tres d’esta historia porque sinón
diba acabar alloriando. Yo mesmu llegué convenceme de que la impresión
del accidente llegara a faceme creyer como real dalgo qu’enxamás sucediera.
Sicasí, puedo aseguravos como qu’agora toi equí, que vi a esa muyerina tirase
del tren. Y la única desplicación razonable que me vien a la cabeza ye qu’aquella
vieya yera la mesma Muerte que saltó del vagón pa dir pañar la vida del infeliz
que taba cruzando’l pasu a nivel en bicicleta…
Sem comentários:
Enviar um comentário