sueños que se cumplen

Naide nun conoz les estrañes macanes de la muerte. A veces armámonos de valor pa siguir el so rastru nun sitiu onde sabemos qu'ella tuvo cuantayá y malpenes somos quien descubrir otres buelgues qu'eses que vamos dexando nosotros detrás del camín.

F. yera un de los meyores amigos de la infancia. Avezaba dir buscalu a so casa los sábados y los domingos pela tarde pa enveredar al cine, si pintaba, o a fundir la paga del fin de selmana nos futbolines. Vivía nes galeríes de madera de xunta la Estación del Norte y envez de pica-y al timbre, solía tirái unes piedruques de graviella a les cristaleres p'avisalu de que taba ellí. Aquel sábadu asomó so madre, empara'l mio amigu. Díxome toa enfoscada que F. nun salía porque taba malu, que nun volviere al otru día a buscalu porque diba siguir malu y que si quería subir a velu más valía que non, porque lo que tenía yera contaxoso.

Alcuérdome de la tristura cola que tuvi apechugar aquella tarde de sábadu solu, ensin saber a ónde dir y ensin nenguna gana de volver pa en casa. Caleyé peles rúes desiertes de Sama, abellugándome del xarazu que cayó tola tarde, embaxo los aleros de les cases. Al final, fartucu d'analayar al debalu, enfilé hasta la sala de xuegos del local de la OJE, na cai Dorado, col determín de matar el tiempu enredando coles máquines de petacos. Más d'una vez entrare ellí col mio amigu F. ensin que naide nos pidiere'l carné nin nos dixera nada, sicasí esa tarde, como si una mano escura s'emperrare en poneme les coses torcíes, l'encargáu del local -un falanxista medio fatu del que tolos guajes se ríen ensin qu'él fuere a decatase d'ello- negóme la entrada, de mala manera, por nun ser sociu.

Siguí caleyando ensin aldu embaxo aquella xarabatiada que nun abocanaba y que me dexara pingando. Andé d'un llau a otru coles manes en bolsu y maldiciendo'l capiruchu ruinu del anorak por calame'l pelo entero y dexar que s'esmuciera l'agua pelos cristales de les gafes, pela nariz, pela boca, arrollándome hasta'l gargüelu. Nun sabía a ónde dir y tampoco tenía ónde resguardame mientres lo pensaba. A la fin, de mala gana, volví pa en casa, gachu, rabiáu conmigo mesmu y col mundu, fartucu de too y pingando como un pitu. Nun m'alcuerdo cómo pasé'l restu de la tarde en casa; seguramente mirando la televisión o lleendo nel mio cuartu. De lo único que m'alcuerdo ye qu'esi sábadu fui chame a la cama primero que polo normal y que después de tar dando vueltes y más vueltes embaxo los cobertores, ensin ser quien a durmir, a la fin vencióme'l sueñu y foi lo que soñé eso que más recuerdo d'aquel sábadu funestu.

Normalmente nun m'alcuerdo de los mios sueños. En despertando adulces me queden arrepresaos na memoria retayos sueltos ensin nenguna filvanación, estampes fugaces que tento remanecer y dilúense na nada como farrapinos d'aguañeve, enantes que llogre visualizalos. El sueñu d'aquella nueche de sábadu, sicasí, perdura na mio alcordanza como si agora mesmo lu tuviera soñando.

Alcontrábame enfrente de les galeríes de madera onde vivía'l mio amigu F. Esperaba qu'asomare después de tirái unes piedruques de graviella a la cristalera, como tenía por costume. Llovía a mares, lo mesmo qu'esa tarde, y llevantárase un airón tan tremendu que facía cimblar les banielles de madera de les galeríes. El mio amigu nun acababa asomar y yo volvía aventar un nuevu garrapiellu de piedrines al ventanal. Entós decatábame de que xusto na casa onde él vivía veíense dellos cristales rotos de la galería y otros tapaos con cartones y tables. Yera l'airón el que los diba frañando de casa en casa. El vendaval diba estrampiado tamién les banielles de les galeríes y les enmarcaciones de los ventanos. Miraba la fachada d'aquellos caseronos de tres pisos con güardiella y talmente paecía que pasaran un cientu d'años desque reparara pa ella esa mesma tarde. L'edificiu enteru abultaba talmente unes ruines onde ya nun moraba naide. Solmenáu por aquellos bastiazos de xarabatiu y ventisquiada, asemeyaba un barcu pantasma remaneciendo metanes la galerna enantes de desapaecer otra vuelta ente la nubla. Tovía soi a sentir l'aforfugu de contemplar l'esmaragullase d'aquelles galeríes sabiendo que'l mio amigu F. taba dientro. Desperté con esi desosiegu, pingando de sudu.

Al otru día fice-y casu al encamientu de la madre de F. y nun fui buscalu. Pasé la tarde del domingu llendo en casa una aventura de Los Cinco d'Enid Blyton, ensin ser quien a sosegar del too del sueñu de la nueche anterior. A eses hores el mio amigu F. ya taba muertu. Nun lo supe hasta'l llunes pela mañana na escuela.

Va unos díes volví per Sama. Pasé en coche pela carretera xeneral delantre de les galeríes de madera onde vivía F. Diba tiempu que nun reparaba pa elles. Al parar nel semáforu que da pasu a la Plaza La Salve diome por mirar a esi, que debe ser l'únicu edificu de galeríes que queda en Sama. Un respigu mui fríu percorrióme la espina dorsal, dende'l rabadiellu a la tenyera. Yera como si'l sueñu d'aquella llonxana nueche de sábadu de la infancia se cumpliera. El tiempu, el que pasa y el que fai y desfai, coles sos rabeseres de xarazu y ventisquiada, fuera esgonciando les baldes de les galeríes de madera, podrigañando les enmarcaciones de los ventanos, frañucando los cristales, aferruñando los tendederos de ropa, furándolo too como'l bruque d'una llepre. En cualaquier momentu paecía que l'edificu podía esfaraguyase nun montonín de povisa y estielles.

Abrió'l semáforu. Siguí carretera pela Plaza la Salve alantre, desosegáu d'atestiguar una vez más qu'hai sueños que se cumplen y non siempre los meyores.