sexta-feira, 22 de junho de 2012

macorina


Bien de veces-y preguntaron a Chavela Vargas quién fuera Macorina. Ella sonreía con una mezcla de ternura y malicia o azorronaba. Dalguna vez contó que conociera a La Macorina en Cuba diba munchos años y que yera una muyer d'una belleza fuera de lo corriente, fía de chinu y mulata: "tenía la piel del color de la hoja de tabaco", según la comparanza de la mesma Chavela. Naide que viera a esa muyer podía escaecese d'ella. 

Nes sos memories, la gran cantante mexicana, amesta más detalles sobre Macorina. Cuenta que coincidió nuna fiesta en L'Habana nos años treinta col escritor asturianu Alfonso Camín y qu'ésti, acabante sentila cantar, allegóse a ella pa regala-y un poema; yera una d'eses composiciones nes que'l bohemiu de Roces tentaba recrear los ritmos y los temes de la música popular de Cuba (una sienda que diben siguir más tarde autores de la isla como Nicolás Guillén y que había conocese como poesía afrocubana). Falaba d'una rapaza tan curiosina y bien plantada qu'hasta les cañaveres d'azúcar se-y echaben a los pies pa qu'ella les moliera nel so molín, los sos pechos yeren carne d'anón (especie de piña) y la so boca una bendición de guanabama madura. Aquella muyer olía a mango y a caña nueva. 
Camín esplayóse abondo con Chavela emponderando la guapura de La Macorina, yera tan preciosa -dixo l'escritor- que la so belleza curaba y de la que pasaba pela cai salía-y al pasu, como les cañaveres del versu, la xente: homes, muyeres, la rapacería, vieyos y vieyes pa pidi-y que los sanara de los sos males. Esi yera'l significáu del estribiellu del son: "Ponme la mano aquí, Macorina/ Ponme la mano aquí".
Tiempu después la propia Chavela tuvo ocasión de conocer en persona a La Macorina. Tamién ella quedó completamente fascinada por aquella belleza capaz de curar. Tampoco pudo escaecese enxamás d'ella. 
Una nueche de soledá y alcohol, a primeros de la década del cincuenta, revolviendo papeles vieyos, Chavela atopó los versos de Camín. Cola aida d'un llapiceru y de la guitarra fue desfueyando'l poema hasta convertilu nun ensalmu, nel son desnudu y íntimu d'un cantar:

tus pies dejaban la estela
y se escapaba tu saya  
buscando la verde raya  
que al ver tu talle tan fino  
las cañas azucareras
se echaban por el camino
para que tu las molieras  
como si fueses molino
...
tus senos carne de anon
tu boca una bendicion  
de guanabana madura
y era tu fina cintura  
la misma de aquel danzon
...
despues el amanecer
que de mis brazos te lleva
y yo sin saber que hacer
de aquel olor a mujer
a mango y a caña nueva
con que me llevaste al son
caliente de aquel danzon 
ponme la mano aqui, macorina
ponme la mano aqui...

Apocayá, googleando a la busca noticies d'aquella muyer qu'inspiró el cantar más celebráu de Chavela Vargas, atopé un artículu firmáu por Josefina Ortega na revista cultural cubana La Jiribilla nel que se daba cuenta de la verdadera identidá de Macorina. Según los datos facilitaos por esta autora el so verdaderu nome yera María Constancia Caraza Valdés y naciera en 1892 en Guanajay, provincia de Pinar del Río. A los quince años llegó a L'Habana y bien lluego había facese notar en tola ciudá pola so belleza. Bailarina, prostituta de luxu y acompañante ocasional d'homes de perres, polo visto, siempre fui quien a caltener a salvu la so independencia y a disfrutar de los dones de la vida con una cierta fortuna que llogró collechar nesos años. Cambió de nome, fízose llamar María Calvo, instalóse nun pisín de la cai Galiano, xunta'l Malecón. En palabres de Josefina Ortega: “Con su rotunda hermosura y su atrevido peinado corto se exhibía por las calles habaneras, acaparando las miradas lujuriosas de los caballeros y el rumor escandalizado de las damas”.
El retratu que se reproduz nel artículu de la revista dixital cubana amuesa a una muyer de rasgos delicaos y sensuales nos que cuesta reconocer a la fía d'un chinu y una mulata, col piel del color de la fueya de tabaco, que remembraben Alfonso Camín y Chavela Vargas. Quién sabe si tamién ellos sucumbieran a la llienda y pa resaltar la belleza de Macorina quixeran valise de los arquetipos propios de la voluptuosidá caribeña. 

La suerte y les sos macanes, nun respetaron l'aldu máxicu que desprendía la Macorina per uquiera pasare y xugaron con ella igual que si fuere una mortal más. Col crack económicu de los años trenta les cartes vuélvense-y desfavorables y acaba perdiendo tola so fortuna. Sábese que llevó una casa de cites na cai Príncipe y que tamién nesti negociu-y fue mal. En 1958 la mítica revista Bohemia entrevístala nuna humilde casa de güespes de Centro Habana onde malvive: "Hoy no tengo ilusiones, pero sí paz. Vivo acompañada de la soledad”, declara la muyer que cuantayá sanaba -y seguramente envelenaba- cola so belleza. Per esi entós y hasta el so pasamientu en 1977 paez ser que se dedicó al oficiu de la santería. Ufiertando sacrificios a Changó y poniendo la mano la so fama de sanadora sobrevivió a la mesma muerte: güei na so tumba otres manes anónimes y enfotaes siguen dexándo-y flores y frutes, veles y puros encesos con vasinos de ron. 
 

Sem comentários:

Enviar um comentário